पुणे | प्रतिनिधी
मोहर्रम महिन्यातील कर्बला येथील शहीदांच्या स्मरणार्थ आणि हिंदू-मुस्लिम ऐक्याचा संदेश देण्यासाठी पंजेतन पवित्र संघटना, महाराष्ट्र राज्य यांच्या वतीने पुण्यात अनोखा सामाजिक उपक्रम राबविण्यात आला. या उपक्रमांतर्गत दहाव्या मोहर्रमच्या दिवशी सरबतासाठी विविध ताजिया व पंजे बसविणाऱ्या मंडळांना मोफत साखरेचे वाटप करण्यात आले.
मोहर्रमच्या नवव्या दिवशी, ‘कतलची रात्र’ म्हणून ओळखल्या जाणाऱ्या रात्री, इमाम-ए-हुसेन (अ.स.) आणि कर्बलातील ७२ शहीदांच्या बलिदानाचे स्मरण करत हा उपक्रम आयोजित करण्यात आला. अन्याय, अत्याचार आणि असत्याविरुद्ध लढण्याचा संदेश समाजापर्यंत पोहोचवण्याचा यामागील उद्देश असल्याचे आयोजकांनी सांगितले.
रात्री १२.३० वाजता, संघटनेचे महाराष्ट्र राज्य अध्यक्ष हनीफभाई शेख यांच्या हस्ते एम. जी. रोड, कॅम्प परिसरातील विविध मंडळांना साखरेचे वितरण करण्यात आले.
या कार्यक्रमाला पुणे कॅन्टोन्मेंट बोर्डचे उपाध्यक्ष सचिन मथुरावाला, व्हॉईस ऑफ महाराष्ट्रचे संपादक सोहेलभाई शेख, क्राईम महाराष्ट्र न्यूजचे संपादक अमीरभाई शेख, पंजेतन संघटना पुणे शहर अध्यक्ष इस्माईलभाई यांच्यासह अनेक मान्यवर उपस्थित होते.
तसेच मुस्लिम सेवा संघाच्या पुणे शहर महिला अध्यक्षा परवीनताई तांबोळी, रजिया रफीक शेख, प्रशांतभाई टिंगरे, कमलजीतसिंह, आलमभाई, अल्लीभाई आणि कमलभाई यांनीही या सेवाकार्यात सक्रिय सहभाग नोंदवला.
यावेळी इमाम हुसेन (अ.स.) यांच्या त्याग, मानवता, न्याय आणि बंधुभावाच्या संदेशाचे स्मरण करून समाजात एकोपा आणि सामाजिक सलोखा वाढविण्याचे आवाहन करण्यात आले. हा उपक्रम पुण्यात हिंदू-मुस्लिम ऐक्याचे प्रेरणादायी उदाहरण ठरला.
✍🏻मुख्य संपादक – सोहेल शेख
